בס"ד

א אידעלע, א אידעלע, שטארק זיך שטארק זיך אידעלע…

יא, ס'זינגט זיך גרינג, ווי זאגט די וועלט - ס'איז גרינג צו מחזק זיין ווען די צרה איז ביי יענעם, פאר די יושבי חושך וצלמות איז עס על אחת כמה וכמה, א איד אין טורמע איז אינגאנצן עפעס אנדערש, ער לעבט אין א וועלט פאר זיך, ווייט אוועק פון זיין פאמיליע, ווייט אוועק פון זיינע קרובים וידידים, ער לעבט ערגעץ ווי אין א וויסטעניש, מער נישט קיין מענטש - נאר ארעסטאנט נאמ. 54786, פארלירט יעדע ביסל נארמאלקייט אין זיך, אפגערעדט ווען ס'קומט א שבת אדער א יו"ט, נישט קיין שבת ליכט, א שבת טיש, נישט קיין סאטמאר'ע שלום עליכם און נישט קיין פאפא'ע מנוחה ושמחה, גארנישט ס'איז שטיל, אויסגעלאשן, אליינס, איינזאם, עלנד, ווי א שטיין, ער האט זיך מיט זיין אלטן אפגעריבענעם אזוי גערופענעם מאטראץ וואס איז הארט ווי א שטיין, דארט לעבט ער, דארט גייט ער שלאפן, דארט שטייט ער אויף און פירט זיין טעגליכע לעבן.

דער אמת איז, ס'איז זייער שווער פאר א מענטש משיג צו זיין וואס דאס מיינט זיצן אין טורמע, פרעג יעדן וואס האט נאר אמאל רח"ל פארזיכט דעם טעם, ס'איז איום ונורא, מענטשן ווערן פארוואנדלט איבער נאכט צו צובראכענע נפשות, א נפש פון א נארמאלער מענטש קען נישט דערהייבן דאס שמאכטן און ווערן פארשימלט אונטער גראטעס, ס'רייסט דאס הארץ ווען ל"ע די טורמעס זענען פיל מיט 'אידעלעך' וועלכע ליידן נעבעך צאם יסורים נוראים עד מאוד רח"ל.

דא קומט אריין איין 'אידעלע', יא! ר' יודל טאבאק שליט"א האט גענומען א מישן וואס ווייניג מענטשן וואלטן געטון, ארויסהעלפן און גרינגער מאכן די פיין און צער פון די אידן אונטער די גראטעס, מען קען זיי ליידער נישט ארויס נעמען פון דארטן, אבער גרינגער מאכן קען מען יא!, ר' יודל שליט"א אטעמט איין זאך 'גרינגער צו מאכן אידן אין די טורמעס', ער האט אונטער זיך א געטרייע חבורה פון געטרייע וואלענטירן, וועלכע ארבעטן אלע שלא ע"מ לקבל פרס, אלע מיטן הייליגן ציל; ליכטיג מאכן 'אידן' אין טורמע, ס'איז נישט קיין גרינגע ציל, אבער מיט א געוואלדיגע עקשנות און מסירות נפש האבן זיי דאס שוין באוויזן פאר איבער 30 יאר - כולן שוין לטובה.

מען לויפט ארום אין די טורמעס מחזק זיין 'אידן', מען שיקט זיי אלעס וואס א 'איד' דארף צו האבן, תפילין, ספרים, תשמישי קדושה, געלט, בריוון, און נאך פילע פעולות גדולות וועלכע מאכן גרינגער דאס לעבן אונטער די גראטעס, איר דארפט פארשטיין - אריינשיקן עפעס אין טורמע איז נישט אזוי ווי איר שיקט עפעס אויף פאסט, יעדע איינצעלע זאך וואס גייט אריין ווערט איבערגעקוקט 20 מאל, און דארף האבן די נויטיגע פערמיטן, אבער ר' יודל מיט זיין געטרייע חבורה טוען אלעס אין די וועלט, אלעס מיינט א-ל-ע-ס, אז אידן זאלן האבן כאטש אביסל ליכטיגקייט אין טורמע.

בלויז אריינקוקנדיג אין די נומערן פון "אנקת אסיר" נעמט א ווארעמע געפיל ארום אלע ביינער, מען העלפט ארום 120 ארעסטאנטן יערליך. איבער 100,000 דעינישעס ווערט פארטיילט אין די עסען פעקלעך וואס ווערט געשיקט אין די תפיסות וואס לאזט אריין עסען. שווערע הונדערטע תשמישי קדושה [תפילין, ציצית, ספרי קודש וכדו'], $10,000 ווערט אריינגלייגט חודש'ליך אין די "קאמיסערי" אקאונט פון יושבי חושך וצלמות. עס קומען פאר 6 גרעסערע ימים טובים חלוקות פון רייכע פעקלעך [ראש השנה, סוכות, חנוכה, פורים, פסח, שבועות]. יעדע וואך ווערט געשיקט א מעילינג פון פרשת השבוע און ליין מאטריאל וכדו' וואס בלויז די פאסטעזש קאסט וועכנטליך $500. אלעס צוזאמען טראגט ר' יודל אויף זיין פלייצע א יערליכע בודזשעט פון אריבער $400,000.

רבותי! טייערע 'אידן'! מען דארף אייער הילף!

אין די יעצטיגע טעג אריינגייענדיג לקראת ימי הרחמים והסליחות ווען אלע אידן זוכן זכותים פארן יום הדין קומט פאר א גרויסארטיגע קריטישע "א יודל קאמפיין" ארויסצוהעלפן דער שליח כלל ישראל הרה"ח ר' יודל טאבאק הי"ו זאל קענען ווייטער אנגיין מיט זיין הייליגע ארבעט און דעקן די שווערע סומע פון $400,000 יערליך צו קענען אנגיין מיט די הייליגע ארבעט. ר' יודל בעט זיך: "איך טוה דאס שוין פאר 30 יאר, עס ווערט מער און מער, איך טוה די גאנצע ארבייט אליין! יא איינער אליין! עס בלייבט מיר נישט קיין צייט צו שאפן די אויסטערלישע געלטער וואס דאס קאסט אפ!

אחים לדעה אחינו בני ישראל רחמנים בני רחמנים וועלן זיך אנרופן מיט אסטראנאמישע סכומים און ארויסהעלפן די ווייטערדיגע פעולות הקדוש פאר אונזערע ברידער יושבי חושך וצלמות, און זיי ווייזן אז זיי זענען נישט אליינס אויפן וואסער, מיר זענען דא זיי ארויסצוהעלפן אין זייער שווערע מצב.

און בזכות זה זאלן מיר שוין אלע ארויס גיין מצרה לרוחה מאפילה לאורה ומשעבוד לגאולה, כולון בני שביא בכספא מתפרקין ועמך ישראל ברחמי ובתחנוני השתא בעגלא ובזמן קריב!